രാജ്യസ്നേഹത്തിന്റെ കുളിപ്പുരകളിൽ | Review |

ജർമ്മനിയിലെ നാസി ഭരണകാലം. സൈനീകനായ അച്ഛന് പ്രമോഷൻ കിട്ടുന്നതോടെ ബ്രൂണോയുടെ ജീവിതം മാറിമറിയുന്നു. പാറി പറന്നു നടന്ന വീട്ടിൽ നിന്നും ജയിലു പോലുള്ള വലിയ വീട്ടിലേക്ക് അവൻ പറിച്ചു നടപ്പെടുന്നു. പുസ്തക പഠിപ്പിൽ നിന്ന്  രക്ഷപെടാൻ  കൗതുകം അവനെ വീടിന് പിന്നിലെ ദുർഗന്ധം വമിക്കുന്ന വലിയ പുകക്കുഴലിന് സമീപത്തുള്ള 'ഫാമി'ലെത്തിക്കുന്നു. നെടുകെ നീല വരകളുള്ള പൈജാമയണിഞ്ഞ ഷ്മുളിനെ ബ്രൂണോ അവിടെ വച്ചാണ് ആദ്യം കാണുന്നത്. വിലക്കപ്പെട്ട കമ്പിവേലികൾക്കപ്പുറത്തെ ഫാമിലെത്താൻ പാകത്തിന് സൗഹൃദം കേൾവിക്കാരനായ്, ഭക്ഷണമായ്, കളിക്കൂട്ടായ്,  പിണക്കമിണക്കങ്ങളായ് വളരുകയായിരുന്നു.
ഷ്മുളിന്റെ അച്ഛനെ കണ്ടെത്താൻ മുന്നിട്ടിറങ്ങി ഒടുവിൽ ബ്രൂണോയും ഷ്മുളും 'രാജ്യസ്നേഹത്തിന്റ '  ഷവറിൻകീഴിൽ നഗ്നരാക്കപ്പെട്ട് കൈകോർത്ത് നിൽക്കുമ്പോൾ,
'മരണക്കുളി' കാത്ത് വയറൊട്ടി എല്ലുന്തി നിരവധി മനുഷ്യർ അവർക്കൊപ്പം ഗ്യാസ് ചേംമ്പറിൽ ഉരുകുമ്പോൾ; ഇടി മുഴക്കത്തിന്റെ അലയൊലികൾ നേർത്തു വന്ന്  Boy in the Striped Pyjamas അവസാനിക്കുന്നു.

യുദ്ധത്തെ വ്യവസായിയുടെ കണ്ണിലൂടെ കാണാൻ മാത്രമാണ് ഓസ്കർ ഷിൻഡ്‌ലറിനാകുക. യുദ്ധത്തിൽ നഷ്ടപ്പെടുന്ന ജീവനുകളെക്കുറിച്ച് അയാൾക്കാശങ്കയില്ലായിരുന്നു, തന്റെ ഉദ്യമങ്ങളിലെ വിജയത്തിനപ്പുറം മറ്റൊന്നും അയാളെ അലട്ടിയിരുന്നില്ല, ക്രൂരമായ നസീപീഡനത്തിന്റെ കാഴ്ചകൾ അയാളിലെ മനുഷ്യനെ ഉണർത്തുന്നതു വരെ. അവസാനത്തെ നാണയത്തുട്ടും പട്ടാളത്തിന് കൈക്കൂലി നൽകി തന്റെ ഫാക്ടറി തൊഴിലാളികളുടെ ജീവൻ സ്വരുക്കൂട്ടാൻ ഷിൻഡ്ലർ ശ്രമിക്കുന്നു. ഒടുവിൽ രക്ഷിച്ചെടുത്തവരോട് വികാരഭരിതനായ് യാത്ര പറയുമ്പോൾ ഓരോ മനുഷ്യന്റെയും  ഉള്ളുലയുന്നു.
മഹാ ദുരിതത്തിലും അതിജീവനത്തിന്റെ പന്തുതട്ടലാകുകയാണ് Two half times in hell.
ദി റീഡറും ബുക്ക്തീഫും കണ്ണു നനയിക്കുന്ന കഥ പറയുമ്പോൾ പുസ്തകം/ വാക്ക് പ്രതിരോധമായ്/ സമാധാനമായ്  കൂട്ടിരിക്കുന്നത് കാണാം. നാസി  അക്രമണങ്ങൾക്കതെ നാണയത്തിൽ മറുപടി പറയുന്ന inglorious basterds -ൽ ഒരാളാകാൻ ആരും കൊതിക്കുന്നു. ഭ്രമങ്ങളിൽ/ ഫാൻറസിയിലെങ്കിലും ഹിറ്റ്ലർ കൊല്ലപ്പെടുന്നു.

 സൺ ഓഫ് സോൾ ( Son of Saul) അവ്യക്തമായ ഫ്രയിമിൽ ആരംഭിക്കുന്നു. സോവോളിന്റെ കാഴ്ചയിൽ ജർമൻ കൊലക്കിണറായ ഓഷ്വെറ്റിസിന്റെ കാഴ്ചകൾ. തടവുകാരിൽ ചിലരെ മാറ്റിനിർത്തി മറ്റുള്ളവരെ നാസികൾ കൊന്നു തള്ളുന്നു. മാറ്റി നിർത്തുന്നവർക്ക് ക്യാമ്പിൽ പണിയെടുക്കാനും കൂട്ടക്കൊലയിൽ മരിച്ച് വീഴുന്നവരുടെ ശവങ്ങൾ മറവു ചെയ്യാനുമാണ് തൊഴിൽ. അവരെ Sonderkommando - എന്ന് വിളിക്കുന്നു. മരണം അവരിൽ അൽപം വൈകിയാണെത്തുക.
സോവോൾ അവരിൽ ഒരാളാണ്. ചിതറിക്കിടക്കുന്ന മനുഷ്യരുടെ ശവശരീരങ്ങൾ വികാരമേതുമില്ലാതെ ചുമക്കേണ്ടി വരുന്നുണ്ട് അയാൾക്ക്. തന്റെ മകനെന്നു കരുതുന്ന കുട്ടിയെ ജൂദ മതപ്രകാരം അടക്കം ചെയ്യാൻ ശ്രമിക്കുന്ന സോവോളിന്റെ ശ്രമങ്ങൾ ആണ് ചിത്രം. അങ്ങേയറ്റം വെറുക്കുന്ന പ്രത്യയശാസ്ത്രത്തോടൊപ്പം പൊരുത്തപ്പെടേണ്ടി വരുന്നുണ്ട് അയാൾക്ക്.

 സോളിന്റെ വിധിയോട് ചേർത്ത് വായിക്കാൻ കഴിയുന്ന  ഇന്ത്യയിലെ വാർത്ത കണുമ്പോൾ ഭയമേറുന്നു. പേര് ഷെഫലി ഹാജോങ്ങ് , അസം പൗരത്വ പട്ടികയിൽ നിന്ന് പുറത്തായവർക്കായി തടങ്കൽ പാളയം ഒരുങ്ങുന്നു എന്ന വാർത്തയോടൊപ്പം വന്ന തടങ്കൽ നിർമ്മാണത്തൊഴിലിൽ ഏർപ്പെട്ടിരിക്കുന്ന നിരവധി തൊഴിലാളികളും പട്ടികയിൽ ഇല്ല എന്ന വാർത്തയിലാണ് ആ പേര് കണ്ടെത്തിയത്. അതായത് തടങ്കൽ പൂർത്തിയായാൽ ആദ്യം അതിൽ അകപ്പെടുന്നത് അത് നിർമ്മിച്ചവരിൽ ചിലരാകാം; ഷെഹലി ഹാജോങ്ങ് എന്ന ആദിവാസി സ്ത്രീ അടങ്ങുന്ന ആരുമാവാം. അവസ്ഥയിൽ പേടിയുണ്ടെന്നും എന്നാൽ വിശപ്പ് മാറ്റാനാണ് ജോലി ചെയ്യുന്നതെന്നും സ്ത്രീ പറയുമ്പോൾ അപകടം എത്രത്തോളമെന്നറിയുന്നു. ഡിറ്റൻഷൻ ക്യാമ്പുകിൽ ആശുപത്രിയും സ്കൂളും കളിസ്ഥലവും ഉണ്ടെന്ന് വാർത്ത വരുമ്പോൾ ഇതൊക്കെ പ്രതീക്ഷിച്ചു  കോൺസെൻട്രഷൻ ക്യാമ്പിലേക്കുള്ള ആളുകളുടെ പലായനം "പിയാനിസ്റ്റിലേ" രംഗമായ് തെളിഞ്ഞു വരുന്നു.
കൂറ്റൻ ചുറ്റുമതിലും നിരീക്ഷണ ടവറും കൊണ്ട് സംരക്ഷിക്കപ്പെട്ടിരിക്കുന്നു പുത്തൻ ഡിറ്റൻഷൻ   ക്യാമ്പുകൾ. അത്തരമൊരു ക്യാമ്പിൽ ജീവിതത്തെ
സുന്ദരമായ് മാത്രം കാണാൻ ശീലിച്ച മനുഷ്യൻ; സ്വന്തം കുഞ്ഞിന്റെ ജീവൻ കാത്ത്, ക്രോക്കി കാട്ടി രസിപ്പിച്ച് മരണത്തിലേക്ക് അടിവച്ച് കൈ വീശി ചിരിച്ച് നടക്കുന്നതോർക്കുന്നു. അയാളെ കണ്ടെത്തിയ നിരീക്ഷണ ടവറിലെ വെളിച്ചം പോലും ആ നിമിഷം നിസ്സഹായായിരുന്നിരിക്കണം.  Roberto Benigni -യുടെ Life is Beautiful; ജീവിതത്തെ അത്രമേൽ പ്രണയിച്ച അപൂർവ്വ മനുഷ്യനെക്കുറിച്ചാണ്.

ദേശീയ പൗരത്വ രജിസ്റ്റർ ബഹിഷ്കരണത്തിന്റെ പട്ടികയാകുമ്പോൾ അഭയാർത്ഥി പ്രവാഹമുണ്ടാകുമ്പോൾ ജർമനിയിലും ഇറ്റലിയിലും കണ്ട വെറുപ്പും അതിൽ നിന്ന് പ്രചോദനം കൊണ്ട ഇന്ത്യൻ വിദ്വേഷവും വിജയിക്കുന്നു.  മനുഷ്യന്റ സ്വാതന്ത്ര്യം തടയപ്പെടുന്ന എവിടെയോ, എവിടെ അവൻ ചങ്ങലകളിലാകുമോ, എവിടെ സങ്കുചിത ദേശീയത അപരനയുണ്ടാക്കുന്നുവോ, എവിടെ ദളിതനും മുസ്സീമും ന്യൂനപക്ഷങ്ങളും അക്രമിക്കപ്പെടുന്നുണ്ടോ
എവിടെ എഴുത്തുകാർ, ചിന്തകർ,വിദ്യാർത്ഥികൾ അടിച്ചമർത്തപ്പെടുന്നുവോ
അവിടെല്ലാം  കോൺസെൻട്രഷൻ ക്യാമ്പുകളുണ്ടാകുന്നു; ചിലപ്പോൾ  മനസ്സുകളിൽ, അല്ലെങ്കിൽ  കെട്ടിടത്തിൽ,  ജയിലിൽ, നാലാളു കൂടുന്നയിടങ്ങളിൽ  ഭൂരിപക്ഷ വർഗ്ഗീയത അഴിഞ്ഞാടുന്ന രാജ്യത്തു തന്നെയും.

 ലോക മനസാക്ഷിയെ പിടിച്ചുലച്ച വംശഹത്യയെ 'ഇന്ത്യൻ സാഹചര്യങ്ങളെ ' അധികരിച്ച് നിസ്സാരവത്കരിക്കരുതെന്ന് പറയുന്നവർക്കുള്ള മറുപടി കൂടി പറഞ്ഞു കൊണ്ടാണ് നാസി കോൺസെൻട്രേഷൻ ക്യാമ്പുകളിലെ യാഥാർത്ഥ്യം ലോകത്തിന് മുൻപിൽ തുറന്നു കാണിച്ച രാത്രിയും മൂടൽമഞ്ഞും എന്ന (Night and Fog) വിശ്വപ്രസിദ്ധ ഡോകുമെന്ററി ചിത്രം അവസാനിക്കുന്നത്:

"എന്നെന്നേയ്ക്കുമായ് നമുക്ക് ഇത്തരം ക്യാമ്പുകളിൽ നിന്നും മോചനം ലഭിച്ചു കഴിഞ്ഞു എന്ന മട്ടിൽ ഈ ബിംബങ്ങൾ ഭൂതകാലത്തിലേക്ക് പിൻവാങ്ങുമ്പോൾ, നാം വീണ്ടും പ്രതീക്ഷ പുലർന്നതായ് ഭാവിക്കുന്നു. ഇതൊക്കെ ഒരിക്കൽ മാത്രം ഒരു നിശ്ചിത സ്ഥലത്തും സമയത്തും നടന്നതാണെന്ന് നാം കരുതുന്നു. നമുക്ക് ചുറ്റുമുറ്റതിനെ നാം കണ്ടില്ലെന്ന് നടിക്കുന്നു. മനുഷ്യരാശിയുടെ അവസാനിക്കാത്ത നിലവിളി നാം കേട്ടില്ലെന്ന് നടിക്കുന്നു."